هات يا عَم قَهوَه سادَه...إرحموا الأقباط يا ساده

هات يا عَم قَهوَه سادَه...إرحموا الأقباط يا ساده 150122

كل شعب مصر ثاير
مـ إللى حاصِل مـ الجَزاير
بهدلونا وهَزَّأونا... طَلَّعُوا ميتين أبونا
هُمَّا ليه بيكرَهونا
قُلتَها وأنا دَمِّي فاير
***
في السُّودان أخدت صورة
للي راجِع عينه عُورَة
وإللى مضروب فوق دماغُه
هي حَرب وللا كُورَة
***
وإللى قلبُه مش نضيف
جاب كتاب إنجيل شَريف
في المُدَرَجات وِوَلَّع
فيه... تَصَرُف كان سَخيف
ولعوا الإنجيل كإنُّه فَحم أو عِلبِة سَجاير
*****
وإللي شُفناه في السُّودان
كان هنا فـ ديروط كمان
ناس حقوده بَهدِلِتنا
ناس ده إيه لأ قُول تيران
***
إيه يا مصر بس مالِك؟
إيه مِغَمِّي عيون عِيالِك
إحنا ليه أكلنا بَعض
وإنتى يا أمَّه إيه جَرى لِك؟
السَّواد عَشِّش فى أرضِك والخَراب دَه كاس وِداير
*****
وِفـ قِنا فَرشُوط حَزينة
مالكوا ياولاد الَّذين
هُوَّ يعنى تار وبايت
بين مِحَمَّدين ومينا؟
***
أصلُه دِمِّل كان مِعَبِّي
هُوَّ كُره مِستخبِّي
وأمَّا آن أوانُه بان
آه يا حيرتي آه يا غُلبي
إحسِبُوا الجَرحى وقولوا لى أد إيه حَجم الخَساير
*****
هات يا عَم قَهوَة سادَة
إرحموا الأقباط يا سادة
مِحتاجين قانون مُوَحَد
نِبنى بيه دُور العِبادَة
***
وإللى هَيشوَح بِسِيفُه
فى الكِنيسَه ويعلَى زِيفُه
مش نِقول مَجنون وعادي
يِعمِل إللي على كِيفُه
إكشِفوا كُل الحَقايق قَطَّعُوا كُل السَّتاير
*****
وإللي يِغلَط أو يِخُون
قِبطي, مُسلِم فيه قانون
وإللي يِنهَب حَق غيرُه
دَه َكانُه في السُّجُون
***
إحنا فِعلاً في احتياج
حق يِعدِل المَزاج
كلمتين في جلسة عُرفي
دول مُسَكِن مش عِلاج
يَعنى مِن أوِّل خِناقَه والجُثَث تِملَى الشَّكاير
*****
يا وَطن عامِل دِماغ
عَن طَريق الحَق زاغ
ياللي فيك الرُّوح بِتِرخَص
بالكتير بتساوي صاغ
***
يا وَطَن يا حِتَّه مِنَّا
إنتَ ليه فَرَّقت بيننا؟
حتى في البطاقة عامِل
خانَة كاتِب فيها ديننا
إمتى نِتساوَى فى أرضَك إمتَى هَتهِل البَشاير؟

هات يا عَم قَهوَه سادَه...إرحموا الأقباط يا ساده Icon_sad

تسلم ايد ياكاتى موضوع فى قمه الصدق موضوع جميل بجد تسلم ايدك بجد بجد

ميغسي ياقلبي

تسلم ايديكى ياخبى موضوع جميل منك ياخبى
وحقيقى بجد تسلم ايديكى ياقلبى

ميغسي ياقلبي
بس بجد البلد بقت محتاجه الدعاء

» المواقع القبطية ( زي ) الأقباط .... !!!
» الأقباط والإخــــوان والأمـــن الهمام !!!!
» لماذا يعتدي بعض الأقباط على معتقدات المسلمين؟
» لماذا يعتدي بعض الأقباط على معتقدات المسلمين؟
» لماذا يعتدي بعض الأقباط على معتقدات المسلمين؟