++ الحضــــن الـــدافـــىء ++

حبيبي ليله تعالى ننسى فيها الجراح .. تعالى جوه حضني وارتاح .

أيوه …هو ده …ده كل اللي انا عايزاه … انا زي اي بنت … محتاجه حد يقوللي

“تعالى جوه حضني وارتاح “

حضن دافي اترمي فيه .. وإيدين تضمني أوي .. احس اني مبسوطه ودفيانه ..

والاهم .. في حضن راجل .. راجل يحميني ويحافظ عليَّ مش واخدني لعبة يلعب بيَّ

اكون انا عنده الدنيا وما فيها ….

انا لا غلطانه ولا مجرمة ؟؟!!

محتاجه اوي لحد يحبني … يحبني مش بكلام ونظرات وبس .

لكن بلمسته ليَّ اللي بتعبر عن قيمتي عنده .. اللمسة اللي تحسسني اني بنت .

والاحلى حضنه اللي بيحرك جوايا مشاعر كتير اوي .

محتاجه احب واتحب … نفسي يكون ليَّ حد يحبني أنا وبس .

حد يديني قيمتي ويقدّرني ….. أكون غالية عنده وشاغلة تفكيره .

هي دي المشاعر اللي جوه كل واحد فينا !!!

لكن المشكله ان الدنيا كلها ماشية بنظام take away وإديها ميه تديك تراوه

يعني عشان تاخدي التراوه ” الحضن الدافي اللي بتحلمي بيه وحقيقي محتاجه ليه “

لازم تدي الميه ” تتنازلى عن حاجات كتير اوي .. اولها إرادتك وكرامتك وآخرها .. وآخرها إنتِ عارفاه كويس !! “

وكله يهون عشان خاطر عيونه .. بالصوت الهادي الحنين يقولك : “هو إنت مش بتحبيني ؟!” ، “هو إنتِ مش واثقه فيِّ ؟!” .

وعشان تحافظي على التراوه لازم تكتّري الميه و … واحده واحده هتدي ميه وميه كتير لكن .. مش هتلاقي تراوه .. عارفه ليه ؟!

عشان هو هيبقى أخد اللي عايزه منك .. لعبه جميله لعب بيها شوية ولما زهق رماها .. سابك وراح يدّور على لعبة تانية جديده بس ياخسارة .. يا ألف خساره عليكي .. ساعتها ؟!

” طب و الحل “ .. الحل إنك تحبي وتلاقي الشخص اللي يحضنك .. الحضن اللي يشبعك .. الشخص اللي يحبك عشانك .

ويحترم مشاعرك .. مش تبقى عنده مجرد أكله حلوه … ولا لعبه جميلة يتسلى بيها شوية وبعدين يرميها …

اللي يكون كل اللي يهمه .. إنه يبسطك .. لو فضلتي تدوري مش هتلاقي حد يقبلك زي ما انتِ مهما كان اللي وصلتيله .

ايوه مهما كانت حالتك .. هو قابلك وراضي بيكِ .. لأ وكمان بيحبك اوي .. أوي .. بيحبك من غير أي شروط ومن غير سبب .

عايزك وبيدور عليكي … وإنت غالية عنده أوي …

غير واحد بس .. واقف مستنيكي ترجعي .. فاتح لك حضن مالوش مثيل ..حضن بيشبع .. لكن آخره مش ضياع .

جربي ومش هاتخسري حاجه …واعتبريها تجربه .. يا صابت يا خابت !!

كل اللي عليكي تعمليه روحيله هتلاقيه مستنيكي … مش هتمشيله كتير لكن … هو اللي هيجري عليكي …

إعترفي انك غلطي .. و إقبلي نفسك زي ما أنت وما تلوميهاش وكفايه بقى وجع فيها .

السيد المسيح قابلها وبتمن غالي مشتريها …

واااااااااااو الكلام الجامد ده
يسلمووووووو كتييير