يا تري مكسوف تكلم ربنا من كتر خطيتك؟.........!ء

فيه ناس كتير ساعات تقف و تقول ..أنا خطيتي كبيرة قوي ..مكسوف اكلم ربنا ..و بعدين ساعات اكلم ربنا و اقول له أخطأت يا ابي ..و اعاهده اني ما اعملش خطية و ارجع تاني للخطية ..طيب يبقي ازاي اكلمه ؟؟؟؟؟

... ..أقولكم قصة جميلة جدا وكمان حقيقيـة ...
قصة شاب مجاهد في طريق التوبة و مشتاق لحياة الطهارة ..و لكن حرب الأفكار و الشهوات كانت تتعبه و تسقطه كثيرا في الخطية لسنين...
و لكنه في تعبه و سقوطه لم ييأس بل كان يقاوم و يجاهد و يثابر في رجاء لكي يسترد ثوب طهارته و كان يقول للرب في صلاته و بكاءه ..: " يارب أنت تري شدة حالي و حزني فانتشلني من الوحل ان شئت أنا أو لم أشــأ .لأني مثل الطين أحب الخطيـة .و أنت يارب إن كنت ترحم القديسين فقط فليس هذا بعجيب لأن أولئك مستحقون ..و لكن في أنا غير المستحق تظهر عظمة مراحمك يارب ..."
و كان يردد هذا كل يوم حتى لم يحتمل شيطان اليأس هذا الرجاء في هذا الشاب فقال له
: " مش مكسوف من نفسك أنك تقف قدام ربنا و تذكر اسمه القدوس بفمك النجس . ."
فقال له الأخ .." أنت تضربني بمرذبة و أنا أضرب بمرذبة ..أنت تسقطني في الخطية و أنا أتمسك بالهي و سنري من الذي سينتصر ..أنت أم مراحم الله ؟؟..."
و لم يحتمل الشيطان ذلك فقال للشاب : " من الآن لن أعود أحاربك لئلا يكون لك اكليل من الرجـاء " ...

حبيبي مهما كانت خطيتك ..
هتكون أبشع من المرأة السامرية ...اللي كان لها 7 أزواج .و الأخير كان ليس لها ؟..
..و لا هتكون أبشع من المرأة الخاطئة اللي المسيح غفر لها لما أمسكت في ذات الفعل ؟...
أو الأنبا موسي الأسود ....؟
و حتي لو كانت أبشع من كل دول ..المسيح مستعد يغفر لك ..ماتقولش خطيتي أعظم من ان تحتمل ..أقف و قوم و كلم ربنا ..و جاهد زي ما الشاب جاهـد ..اتمسك بمسيحك ..قول له :" غير حياتي ..شيل الخطية من حياتي .."
اطلب معونته حبيبي ..لأن لوحدك عمرك ما هتقدر أبدا ...هو اللي هيعطيك المعونة ..
.و كل مرة تخطئ قوم و كلم ربنا و صلي ماتخليش شيطان اليأس يضحك عليك ..
دي المصيبة ان الشيطان يغريك . .يغريك ..لغاية ما يوقعك ..و بعدين يقولك انت خاطئ ..انت دنس ..انت وحش ..ازاي تقف تكلم ربنا و يتعبك جدا ..يبقي لحظتها اضربه بمرذبة الرجاء في ان المسيح هيغفر لك ..احرقه بصلاتك ..و ثقتك في مراحم ربنا
افتكر الخطية عملت فيك ايه و ذلتك قد ايه و مررت حياتك ...لذة وقتية و بعدها تعب و مرار ...و المسيح كل ده واقف يبكي عليك ..يبقي لازم تقوم بعدها تمسح دموع حبيبك المسيح بصلاتك ...هو عارف ضعفك ..مستنيك بس تلجــأ لـــه و تصرخ له و تقول له ارحمني ....

المسيح يوم الدينونة ( مش هيسألك أنت ليه أخطأت ؟..هيقولك أنت ليه ماتبتش؟؟ )
حبيبي احنا بطبيعتنا التراب بنميل للتراب و اللذات الأرضيه ..لكن المسيح ادانا وعد اذا طلبنـاه انه يجيب صلاتنا..و هو أمين
.قال ( اسألوا ..تعطوا ..اطلبوا تجدوا ..اقرعوا يفتح لكم )
( كل ما تطلبونه في الصلاة مؤمنين تنالونـــــــــه )
ماتقولش مش قادر ..أنت فعلا لوحدك مش هتقدر ..قول بقوة المسيح هقدر . المسيح بيقول (بدوني لا تقدروا أن تفعلوا شيئــــا )...
و العادات و الخطايا اللي بتتكون في عشرات السنين ..مش معقول فجأة هتقف عنها ..لكن أكيد هتحتاج مجهود .جاهد يا حبيبي بالصلاة ماتقولش مكسوف..ماتعرفش فرحة المسيح بتكون قد ايه انه يشوفك بتلجأ له ..و بتقول له خلصني ..و المسيح قادر يخلصك
(أستطيع كل شئ في المسيح الذي يقويني)
و لما المسيح هيشوف جهادك هيحسب لك اكليل في جهــادك ضد الخطية دي ...
المسيح قال (لم آت لأدعو ابرار بل خطاة الي التوبة ..)..يعني المسيح جالك مخصوص ..يبقي بعدين تقول له مكسوف؟؟..
و بعدين ماتضايقش ..صدقني انك تكون مكسوف من خطيتك دي حاجة كويسة جدا لأن معناها ان الروح القدس شغال فيك .و بيأنبك ..ماتنتظرش لغاية ماينطفئ الروح ..
مادام ربنا مديك حياة للحظة دي ..ده معناها انه لسه منتظر رجوعك لحضنه
و بيقولك :" حتي لو كنت فقدت الأمل في نفسك أنا مافقدتش الأمل فيك ..."