ايه الحل؟؟؟؟؟؟؟

ازاى الاقى شريك حياتى وفين؟؟؟؟؟؟؟؟؟؟

لسان حال الشاب بيقول: انا كل همى اكون مستقبلى واقف على حيلى واعمل قرش ...و... وووو الخ
وبيخرج يا عينى يمكن من الصبح لبليل فى الشغل (وممكن يكون شغال بدل الشغلانة اتنين) واحتمال يكون عنده بنات فى الشغل بس ممكن تلاقى معظمهم اوفر ايدج ههههههههه يعنى اكبر منه
يخلص الزبون الشغل وما يصدق يرّوح يعنى باختصار من البيت للشغل ومن الشغل للبيت ولو هو واد اجتماعى شوية هتلاقيه بيقابل اصحابه اللى هما اولاد زيه طبعاً ويخرجوا شوية بالليل ده طبعاً لو لسه فيه نفس وممكن يكون فاضى يوم الجمعة تلاقيه بيروح كنيسته اللى هو متعود عليها واللى حافظ كل بنت فيها وطبعاً مفيش ولا واحدة عجباه وده ممكن يكون لعدة اسباب ممكن يكون فيه سابقة قديمة وعملاله عقدة ....... يعنى كانت مرتبطة بواحد صاحبه او اتقدم هو لواحدة صاحبتها او او او ....الخ يا اما للاسف هو متعلق بواحدة واللى هو متعلق بيها مش حاسة بيه او يمكن يكون فى مخيلته واحدة معينة بمواصفات معينة يعنى معظم الشباب هتلاقيه عايزها تكون فى جمال سعاد حسنى وف ادب واخلاق الراهبات وثقافتها زى فلانة وخفة دمها زى علانة .....يعنى كاملة مكملة ......يبقى يا عينى هيلاقى فين اللى هو عايزه
طبعاً يمكن اكون بقول الكلام بهزار بس للاسف ده الواقع الواحد عايز الواحدة خالية من الكوليسترول ... قصدى خالية من العيوب


نيجى بقى للبنات..... البنت بقى دى اللى حالتها حالة نفس الحكاية بس يمكن اكتر شوية لان دى بنت واحنا فى بلد شرقى
لو شغالة يبقى من البيت للشغل برضه ومن الشغل للبيت...... ومفيش تأخير
وممكن يكون عندها كام شاب فى المكان اللى هى شغالة فيه بس حاجة من تلاتة...... يا اما لسه بيجهز نفسه يا اما اصغر منها او الحاجة التالتة انه يكون مرتبط هاهاهاهاهاها
وطبعا فى الكنيسة بتاعتها برضه نفس المشكلة فيه سابقة واتنين وتلاتة عند كل ولد ..... يا اما زيه زى اللى فى الشغل
يعنى متقفلة بالضبة والمفتاح هههههههههههه لا شغل ولا كنيسة
يا اما للاسف وده اللى بيبقى موجود كتير برضه ان البنت تكون متعلقة بحد من الشغل ولا الكنيسة (الاماكن اللى هى بتروحها طبعاً ما هو مفيش فرصة انها تتعرف حد من حتة تانى) وهو مش حاسس بيها او مشغول بواحدة تانى
او الاسوأ من ده كله ان مفيش واحد من اللى قدامها فيه طموحاتها واحلامها ........ اصل احنا على اد كده برضه مبيعجبناش العجب ولا الصيام فى رجب.
واخر البدائل ان يكون فيه ولد فى العيلة وهى مش عايزة تاخد من العيلة اصل فيه مثل بيقول جواز القرايب نصايب.

وبعد ما اتقفلت على الشباب والشابات مازال السؤال بيطرح نفسه
يا ترى ايه الطريقة اللى ممكن نعرف بيها بعض بطريقة لائقة ؟
جواز الصالونات فيه اعتراضات عشان البنت متبقاش سلعة بتتباع ..... وجواز القرايب نصايب .......وقصص الحب البيت بيرفضها وعمر ما فى اب هيسمح لبنته انها تقابل شاب عشان يعيشوا قصة حب قبل الارتباط وفى الاخر تنتهى بفشل بسبب الامكانيات؟