عـاطـفـة الـعـصـر الـحـديـث

عاطفة العصر الحديث
مسمى غريب ولكنه واقعى مع انه من المفروض أن العاطفه بمعناها الشامل شىء ثابت ولا يتغير فى أى عصر ولكن للاسف العاطفه فعلا تغير شكلها وحتى مسمياتها اختلفت .
الحقيقه انا مش بتكلم عن الحب ولكن بتكلم عن العاطفه ما بين شخص وشخص تحت أى مسمى .. صداقه .. زماله .. جيره ..قرابه .. كل المسميات الجميله دى أصبحت فى خبر كان وحل محلها كلمه واحده أكثر عموميه وشموليه بندعى كرهنا لها ولكننا نعشقها بداخلنا .. ستتعرفون عليها وتفهموا مقصدى من بعض الامثله اللى هقولها
على سبيل المثال
فجأه تلاقى اتصال من صديق أنقطعت أخباره عنك من فتره وبتسمع عنه من بعيد لبعيد انه مثلا اتجوز وبتزعل انه نسى يعزمك فى فرحه بس يلا مش مهم المهم انه بخير
ازيك واخبارك ايه وواحشنى يا راجل وقلبك يبقى هينط من السعاده والذكريات الجميله بقى تجرى ورا بعضها فى دماغك وفاكر لما ...... و أنا وأنت لما رحنا و ......
وفجأه تلاقيه بيسألك هو أنت لسه عمك مدير المستشفى الفلانى أصل المدام هتولد هناك ومحتاج توصيه منك
ولا جارك اللى بقالك كام سنه بتشوفه الصبح وانت رايح شغلك ويادوبك بيرد على صباحك بالعافيه ويجرى تلاقيه النهارده أخر كرم معاك وبعد احلى صباح ازيك وازى المدام والاولاد ويا راجل اغلطوا مره وشرفونا بالزياره وبعدها يا ريت حضرتك تتوسطلى عند فلان الفلانى أصلى محتاج لقرض علشان داخل مشروع كبير ومحتاج فلوووس زياده
ولا بقى قريبك اللى بتقابله من العيد للعيد وفى المناسبات العائليه يا حرام داخ عقبال ما جاب رقم موبايلك وازيك يا وحش ياللى مبتسألش عليا كده برضه ده أحنا حتى قرايب
قولى بقى تعرف حد فى المرور اصل رخصتى اتسحبت
وغيره وغيره يا سلام أحلى صداقه وأحلى قرابه وأحلى جيره يا سلالالالالالالالالالالام
أدى الناس ولا بلاش
الناس لبعضيها ونفع وأستنفع
هى دى حياتنا بكل صراحه .. راحت الصداقه وحل محلها المصلحه
انتهت القرابه وهلت المصلحه
نسينا الجيره وافتكرنا المصلحه
كل المسميات راحت وانتهت وبقينا نعيش مع عاطفة العصر الحديث اللى اسمها المصلحه