فيه آية رائعه كلنا عارفينها بتقول : "إنما نهاية كل شئ قد أقتربت فتعقلوا واصحوا للصلوات " .
لما الرسول قال الآيه دى قالها من حوالى 2000 سنة وكان بيقول اقتربت طيب ودلوقتى
وبعد المده دى كلها يبقى النهاية قريبه اد ايه ؟
نهاية ايه ؟
نهاية الأيام طبعا - نهاية العالم
السيد المسيح اتكلم عن مبتدأ الأوجاع
حروب - امراض و اوبئة - كوارث طبيعية - مجاعات - ارتداد عن الايمان
فى القرن العشرين اللى فات ده اتحققت نبوات كتير عن نهاية الأيام والعلامات زادت بشكل كبير ومتكرر وسريع ومن له أذنان للسمع فليسمع ومن له عينان للبصر فلينظر ايضا ويرى ويدرك
حروب
حروب عالمية اولى وتانية
مئات ان لم يكن آلاف الحروب الأهليه
فى السبع سنوات الأخيره فقط هناك حوالى 4 حروب لازالت قائمة
امريكا - العراق
امريكا - افغانستان
اسرائيل - لبنان
وطبعا الحرب اليومية بين اسرائيل والفصائل الفلسطينية
ده غير المناطق الملتهبه زى كوريا الشماليه وايران والسودان والصومال واقليم كردستان
وكل ده معاه تطور غير مسبوق على المستوى العسكرى ومستوى التسلح
ومثال ذلك القنابل الذكية والعنقودية والهيدروجينية
ونتمنى السلام للمناطق دى كلها
امراض واوبئة
تفشى السرطان بجميع انواعه
الايدز بداية من السبعينيات
الجمرة الخبيثة - والسارس - وانفلونزا الدجاج -ثم انفلونزا الطيور - ثم اخيرا انفلونزا المكسيك المعروفه بانفلونزا الخنازير
تفشى اوبئة الكوليرا والطاعون على مدى سنين عديده فى بلاد كتيره زى افريقيا
كوارث طبيعية
غالبا مفيش يوم بيعدى الا ونسمع عن زلزال او بركان او سيول
ومثال بسيط اكبر كارثه فى تاريخ الانسان الحديث كارثة تسونامى
غير الحرائق الطبيعية فى الغابات واهتزازات القشرة الا رضية
ارتداد عن الايمان
طبعا ملحوظ جدا حالة الفتور الروحى فى حياتنا
ده غير مئات البدع والهرطقات
والديانات الارضيه الوضعية
وحالات الالحاد واضطهاد المؤمنين فى مناطق كثيره فى العالم
غير الانشقاقات الكثيرة بين الطوائف المسيحية غالبا عدد الطوائف البروتستانتيه حاليا فى امريكا بس 400 طائفة
الأيام اللى بنعيش فيها ايام صعبة
وباء وفناء وغلاء وسيف اعداء
اضطهاد للايمان وللكلمة ولأسم ربنا
حروب وامراض وكوارث
السيد المسيح ابتدأ من زمان وقال توبوا لأنه قد اقترب ملكوت السموات
والرسول بولس قال - ماران آثا - يعنى الرب قريب
آمين تعال ايها الرب يسوع
الروح والعروس يقولان تعال
مجئ الرب قريب ومخيف هو الوقوع بين يدى الله الحى زى ماقال بولس الرسول
لازم نصحى ونفوق لحياتنا الأبديه لازم كل واحد يركز فى حياته الروحية هو وبس
مفيش حد هاينفعك ولا حد هايمنع عنك الموت الأول
لكن ربنا قادر انه يمنع عنك الموت التانى
ليه ترمى نفسك فى سكة الجحيم وربنا فاتح حضنه لسكة الفردوس
ليه تدخل من الباب الواسع وطريق الهلاك
علشان تلاقى نتيجه مش هاتحبها ابدا و لا أنت متخيل اد ايه هى قاسية ومخيفة ومرعبة وموجعه ومؤلمة بشكل لا يعبر عنه بكلمات بشريه او احاسيس او حتى افكار تخيلية
انا مش عاوز اعرف ايه هو الجحيم و لا عاوز اعرف ايه هى بحيرة النار يمكن بس اعرف معرفه سطحية علشان ابتدى اخاف وتبقى بداية لحياة توبه
لكن انا عاوز اعرف ايه هو الفردوس وعاوز اعرف ايه هو الملكوت
انا هامسك فى ايد ربنا وهافضل معاه مش بقوة ولا بقدره بل بروح ربنا
مش بايمان وفضل منى بل بنعمة ربنا
مش باعمال وفضائل صالحه منى بل بدم ربنا الغالى قوى
وكيف ان أهملنا خلاصا هذا مقداره ؟
اذكرنى يارب متى جئث فى ملكوتك
لما تيجى يارب فى يومك المجيد وتنظرك كل عين والذين طعنوك وتجثو لك كل ركبة مافى السماء وماعلى الأرض وماتحت الأرض
اذكــــــــــــــــرنى
وقبلا يارب اعطينى حياة التوبة
اسباب وتفاصيل ونتائج التوبه
بنعمتك بسلطانك بقوتك بمجدك
اكتب اسمى فى سفر الحياة
واعطينى ان اغسل ثيابى فى دم الخروف
وان ارنم الترنيمة الجديدة والبس الثوب النقى والاكليل النورانى واغلب معك ايها الغالب
اعطنى ان اسجد واترنم قائلا " عظيمة وعجيبه هى اعمالك أيها الاله القادر على كل شئ وعادلة وحق هى طرقك ياملك القديسيين من لايخافك يارب وبمجد اسمك لأنك وحدك قدوس ، لأن جميع الامم سيأتون ويسجدون أمامك لأن أحكامك قد أظهرت " رؤيا 15 :3-4
موضوع: نهاية كل شئ قد أقتربت 
الأربعاء مايو 06, 2009 5:26 pm
